تاند: ( یکشنبه ، د دلوې لسمه) طالب چارواکو ویلي، چې په کابل کې د ترکيې سفير سره په اونۍ کې د آريانا افغان هوايي شرکت د دوو او کام ایر شرکت د يوې الوتنې په اړه هوکړې ته رسېدلي.
د طالب وياندويانو په حواله، په دې اړه يې نن د رييس الوزرا اداري مرستيال مولوي عبدالسلام حنفي د ترکیې سفیر جیهاد ارگینآی سره خبرې کړي.
طالب چارواکو د دغو الوتنو د پیل په اړه نور جزییات نه دي ورکړي.
له دې سره سره ویل شوي، چې د ترکیې د سرې مياشتې اداره به تر راتلونکو څو ورځو پورې ۷۵۰ ټنه بشري مرسته د ایران او ترکمنستان له لارې افغانستان ته را ورسوي.
ترکي چارواکو هيله ښودلې، چې مرستې يې د افغانستان په ټولو ولايتونو کې په شفافه توګه تقسيم او طالب چارواکي ورسره همکاري وکړي.
طالب لوري د ترکیې له مرستو څخه د مننې ترڅنګ په دې برخه کې د همکارۍ ډاډ ورکړی.
هغه ترکي چارواکو ته په افغانستان کې د خپلو پانګوالو د هڅولو خبره هم کړې، څو په افغانستان کې پانګونې وکړي.