تاند: ( یکشنبه ، د دلوې لسمه) د طالبانو د حکومت وياندويانو اعلان کړه، چې د مشرتابه د حکم پر اساس يې د دوی کرنې، اوبو لګولو او مالدارۍ وزارت پخوانی مرستیال مولوي شمس الدين پهلوان د لوی څارنوال په توګه وټاکل شو.
طالبانو د نوموړي په اړه نور جزییات نه دي ورکړي.
هغه په داسې مهال ټاکل کیږي، چې پر طالبانو د صحرايي محکمو او خپلسرو وژنو تورونه زيات شوي دي.
نن د ملګرو ملتونو د سرمنشي په حواله خبر ورکړل شو، چې هغه د طالبانو په لاس د څه باندې سلو مخکینیو حکومتي منسوبینو د خپلسرو وژنو خبرونه تایید کړل او له دې اړخه یې د طالبانو د مهارولو غوښتنه وکړه.
طالبانو بيا له خلکو سره د ناوړه چلند او زور زياتي موضوع رد کړې ده.