تاند: ( یکشنبه ، د دلوې لسمه) د افغانستان د روباټ جوړونکو نجونو ډلې په نړیوالو سیالیو کې، چې ۸۸ هېوادونو پکې برخه لرله، دويم مقام ګټلی دی.
يادې سيالۍ د «Printed Circuit Board The Change» په نوم ترسره شوې، چې افغان روباټ جوړونکو نجونو پکې د ځیرک ترافيکي سيستم له جوړولو سره دویم مقام خپل کړ.
په دغو سياليو کې درېیو افغان روباټ جوړونکو نجونو ګډون کړی و او د افغانستان د ترافیکي ستونزو د حل په اړه یې خپل روباټ سیستم جوړ او سیالۍ ته وړاندې کړ.
افغان نجونو دغه سيستم د وايفای په وسیله وصل کړی و، چې د ترافيکو له ادارې څخه په اسانه روباټونه کنټرولیدل او د ترافيکي کامرو له فعالولو سره یې د سرغړونو مخه نیوله.
افغان روباټ جوړونکو نجونو د طالبانو له واکمنیدو سره هېواد پریښی او په مکسیکو کې یې پناه اخيستې ده.
د پخوا برعکس د افغانستان هېڅ کوم چارواکي د دوی دا برياليتوب نه دی ستایلی.