تاند: ( پنجشنبه ، د دلوې اوومه) د ناروې په پلازمېنه اوسلو کې د طالبانو او يو شمېر اروپايي هېوادونو له ناستې وروسته دغو هېوادونو د یادې ناستې په اړه ګډه اعلاميه ورکړې ده.
په اعلاميه کې راغلي، چې افغانستان سولې او ثبات ته د رسېدو لپاره د يوه پراخ بنسټه او انتخابي نظام رامنځته کولو ته جدي اړتيا لري.
په اعلاميه کې ټینګار شوی، چې طالب پلاوي سره د دغو هېوادونو د استازو لیدنه په هېڅ ډول د طالبانو د په رسميت پېژندلو مانا نه لري.
طالبانو په یوه اعلامیه کې دا ناسته مثبته ګڼلې او له پایلو څخه یې خوښي څرګنده کړې ده.
په ناسته کې طالبانو يو شمېر افغان سیاسي څېرو سره هم لیدلي، چې د هغوی په وینا له طالبانو څخه یې د ټول ګډونه نظام د جوړېدو غوښتنه کړې او خپله طرحه يې هم ور سپارلې ده.
طالبانو دغو څرګندونو ته کوم غبرګون نه دی ښودلی.