تاند: ( پنجشنبه ، د دلوې اوومه) د پخواني ولسمشر حامد کرزي د دفتر رئیس عبدالکریم خرم وايي، چې طالبانو سره د ناروې د اوسلو ناسته کې د څوکیو په ویش نه، بلکې پر دې غږيدلي چې څنګه افغانستان يو داسې نظام ولري چې ټول افغانان پکې ځان وویني او د مالکیت احساس یې وکړي.
نوموړي د اوسلو ناستې په څنډه کې د يوې مرکې پر مهال زياته کړه، چې په دې اړه د ناستې ګډونوالو افغان څېرو طالبانو ته خپله لیکلې طرحه وسپارله، څو په کابل کې پرې مشوره وکړي.
خرم د ناستې فضا دوستانه او هیله بښونکې ياده کړه، خو په دې اړه یې له تبصرې ډډه وکړه چې آيا طالبان په خپلو منځو کې د داسې طرحو د منلو په اړه اختلاف لري او کنه؟
د خرم ټینګار دا و، چې په بهرنيو اړيکو کې افغانستان باید خپله بې طرفي وساتي.
طالبانو تر اوسه دوی ته د يادې ناستې د افغان ګډونوالو د سپارلې طرحې په اړه څه نه دي ويلي.
د ناستې يوه بل ګډونوال سید اسحق ګیلاني ویلي، چې دوی د ټول ګډونه نظام جوړول اړين ګڼلي او طالبانو ته یې د همداسې نظام د جوړولو طرحه سپارلې ده.