تاند: ( چار شنبه، د دلوې شپږمه) د طالبانو د حکومت د ملي بسونو د ادارې مشر ملا ايوب وايي، چې نن یې کابل ښار کې ۱۰۰ ملي بسونه تازه فعاليت ته ګومارلي.
د هغه په وينا، دا ملي بسونه ویجاړ شوي وو، چې دوی ترمیم کړي او د کابل ښار د خيرخانې، کارته نو، خراسان ښارګوټي او قلعه زمان خان په مسیرونو کې فعاله کړي دي.
د ده په وينا، دا ملي بسونه به هره ورځ د سهار له شپږو بجو څخه د ماښام تر شپږو بجو پورې فعاليت کوي.
د طالبانو حکومت ته د جمهوري نظام څخه يو زر او نهه څلويښت ملي بسونه پاتې دي، چې څه باندې ۶ سوه يې د کابل ښار اړوند دي.
کابل ښاریانو د ملي بسونو له نشتوالي پخوا هم شکایت درلود، خو ويل کیدل چې مخکې د طالبانو د بريدونو له وېرې دغه بسونه سم نه فعالیدل.
اوس کابل ښاریان د ملي بسونو د بیرته فعالولو اعلان ته خوشاله دي او پر شویو ژمنو د عمل تمه لري.