تاند:( دوشنبه، د دلوې څلورمه) د امریکا د بهرنیو چارو وزارت ويلي، چې د افغانستان د سولې لپاره د دغه هېواد ځانګړی استازی ټام ویست به نن دوشنبه له طالب پلاوي سره په ناروې کې د افغانستان د ټول ګډونه سیاسي نظام د جوړولو په اړه خبرې وکړي.
د امریکا د بهرنیو چارو وزارت په وینا، د یوه سیاسي نظام جوړېدل چې د ټولو افغانانو استازیتوب وکړي، د ټام ویست او طالبانو پلاوي د کتنې د اجنډا په سر کې دي.
انساني او اقتصادي ناورین ته د پاملرنې او زده کړو او کار ته د ښځو د لاسرسي حق، له ترهګرۍ سره مبارزه او له افغانستانه د امریکا د امنیتي اندېښنې لیرې کول، په اوسلو کې طالب لوري سره د امریکا د ځانګړي استازي د بحث نور مهم موضوعات دي.
د طالبانو ویاند ذبیح الله مجاهد، هیله څرګنده کړې چې دا خبرې یوه سوله ییز وضعیت ته د جګړې فضا په بدلېدو کې مرسته وکړي.
د طالبانو منتقدین بيا د دې ډلې د نه بدلیدو ادعا لري او د ناروې په ګډون په مختلفو اروپايي هېوادونو کې يې، ناروې ته د طالب پلاوي د بللو پر ضد لاریونونه کړي.
د ناروې د بهرنیو چارو وزیرې ویلي، چې د طالب پلاوي بلل، د هغوی د په رسميت پېژندلو په مانا نه دي.