تاند:( دوشنبه، د دلوې څلورمه) له بلخ ولايت څخه راپورونه وايي، چې پرون مازيګر د مزار شريف ښار د لسمې ناحيې اړوند په علي چوپان سیمه کې د طالبانو ۲ وسله وال کسان ناڅرګندو کسانو په ډزو وژلي او وسلې یې ورڅخه وړي دي.
د وژل شویو طالبانو د هويت په اړه څه نه دي ویل شوي، خو د وژونکو په اړه زياته شوې، چې له پېښې وروسته په يوه ټيکسي موټر کې تښتیدلي دي.
د پېښې مسووليت چا پر غاړه نه دی اخیستی.
څو شپې مخکې په مزار شريف کې پر یوه کور د عملياتو پر مهال د طالبانو او مقاومت ډلې د وسله والو تر منځ وسله واله نښته کې هم د دواړو لوريو د مرګ ژوبلې خبر ورکړل شوی و.
طالبانو د تازه او مخکینۍ پېښې دواړو په اړه څه نه دي ويلي.
ويل کيږي، چې طالبان د خپل مطبوعاتي پالیسۍ په اساس ورته پېښې له رسنيو پټې ساتي.