تاند:( پنجشنبه شنبه، د جدي دېرشمه) د امريکا متحده ايالاتو د ملي امنيت سلاکار جيک ساليوان يو ځل بيا له طالبانو غوښتي، چې په افغانستان کې د ټول ګډونه دولت د جوړېدو لپاره عملي ګامونه واخلي.
نوموړي په يوه تازه مرکه کې خبرداری ورکړی، چې له دې پرته به يې هېواد طالبانو ته کوم سپين چيک ورنه کړي.
د امريکا د ملي امنيت سلاکار له فارن پالیسۍ مجلې سره په دې تازه مرکه کې له افغانستان سره د خپل هېواد د بشري مرستو په دوام هم ټينګار کړی.
د ده په وينا، امريکا متحده ايالات له ملګرو ملتونو او نورو نړيوالو بنسټونو سره په افغانستان کې د بشري مرستو د سمبالولو لپاره ګډ کار کوي.
د ساليوان په وينا، امريکا متحده ايالات دا اوس هم د افغانستان د بشري ناورين د مقابلې لپاره د بشري مرستو تر ټولو لوی تمویلونکی دی.
طالبانو د امريکا د دغه لوړپوړي چارواکي څرګندونو ته کوم غبرګون نه دی ښودلی.
مخکې طالب مشرانو خپل حکومت « ټول ګډونه» ګڼلی او په دې اړه خبرې يې د افغانستان داخلي بحث ياد کړی و.