تاند:( سې شنبه، د جدي اته ویشتمه) د طالبانو مالیې وزارت وايي، چې د دولتي مامورينو د عقرب او قوس مياشتو معاشونه به ژر اجرا کړي.
د دغه وزارت له لوري په خپره شوې اعلامیه کې له ټولو دولتي ادارو غوښتل شوي، چې د خپلو کارکوونکو د معاشونو د طی مراحلو لپاره له دغه وزارت سره په اړیکه کې شي.
د طالبانو له واکمنیدو سره د دولتي کارکوونکو د معاشونو ورکړه ټکنۍ شوې او د ځينو ادارو کارکوونکي ان د اسد میاشتې د معاشونو د نه ترلاسه کولو شکايت کوي.
له دې سره، ويل کيږي چې ځینو وزارتونو او ادارو ته د ميزان له میاشتې وروسته معاشونه نه دي ورکړل شوي.
طالب چارواکي وايي، چې د معاشونو د ورکړې سيستم به ژر په مياشتيني ډول پیل او په عادي ډول مخته لاړ شي.
د دوی په وینا، له شل کلن ځنډ وروسته یې په لومړي ځل د افغانستان بودیجه له داخلي عوايدو برابره کړې او د فساد له مخنیوي سره یې د عوايدو د حیف و میل مخنيوی کړی دی.
خلک بيا شکایت کوي، چې د طالبانو له واکمنیدو سره یې فقر، بې کاري او لوږه زیاته شوې ده.