تاند:( سې شنبه، د جدي اته ویشتمه) د طالبانو د حکومت مرستيال وياند انعام الله سمنګاني وايي، چې د دوی حکومت د رسنیو په اړه د تېر جمهوري نظام قوانين لغوه کړي نه دي، خو ځينې تعديلات به پکې راولي.
نوموړي په يوه ټلويزيوني بحث کې دا خبره وکړه، خو ويې نه ويل چې د دغو نا لغوه شویو قوانینو کومې برخې په کوم ډول عملي شوي دي؟
د افغانستان د ژورناليستانو د ملي ټولنې استازي، چې له دغه طالب وياند سره په ټلویزیوني بحث کې یې ګډون درلود، په دې اړه د نوموړي څرګندونو ته غبرګون وښود.
د ژورناليستانو د ملي ټولنې استازي وويل: که د طالبانو حکومت د تېر نظام رسنيز قوانين نه وي لغوه کړي، د نافذ والي په اړه یې باید رسمي مکتوبونه واستوي او دا قوانین عملي هم کړي.
د ژورناليستانو د ملي ټولنې په يوه سروې کې دا پایله تر لاسه شوې، چې تر ۹۰ سلنه ډېرې افغاني رسنۍ د طالبانو د استخباراتو د فشار له کبله د خپل استقلالیت د لاسه ورکولو ته مجبوره شوي دي.