تاند:( دوشنبه، د جدي اووه ویشتمه) راپورونه وايي، چې پاکستان تېره شپه د کونړ پر سرکاڼو ولسوالۍ ۲۱ توغنديز بریدونه کړي دي.
د کونړ ځايي اوسیدونکو او یو شمېر طالب چارواکو د دغو توغندیزو بریدونو خبر تاييد کړی دی.
په کونړ کې د طالبانو د سرحدي ځواکونو وياند حمدالله همدرد له دغو توغندیزو بریدونو څخه وروسته له پاکستاني سرحدي ځواکونو سره د دوی د نښتې خبر هم ورکړی.
د هغه په وينا، په توغندیزو بریدونو او نښته کې چا ته زیان نه دی اوښتی.
دا په داسې حال کې ده، سبا د پاکستان د ملي امنيت سلاکار ډاکټر معيد يوسف د یوه لوړپوړي پلاوي په مشرۍ کابل ته په سفر راځي.
څه موده مخکې د ننګرهار په لعل پورې ولسوالۍ کې هم د طالبانو او پاکستان د سرحدي ځواکونو تر منځ نښته شوې وه.
طالبانو د نښتې دليل پر ډیورنډ فرضي کرښې د پاکستان له لوري د اغزن تار د لګولو ممانعت ښودلی و.
تازه، د پاکستان د کورنیو چارو وزیر شیخ رشید ويلي، چې طالبان د دوی وروڼه دي او ورسره منلي يې دي، چې پر ډیورنډ کرښه به اغزن تار لګول کیږي.