تاند:( دوشنبه، د جدي اووه ویشتمه) د طالبانو د پوهنې وزارت سرپرست مولوي نورالله منیر د ناروې له سفیر اندریس لیندمن سره لیدنې پر مهال د میرمنو پر زده کړې، د استادانو پر معاشاتو او ښوونیز نصاب خبرې کړي.
هغه په دې لیدنه کې وویل: چې کله د نجونو د زده کړې لپاره په کلتوري او دیني لحاظ یو مناسب چاپیریال برابر شي، له اوومه تر دولسم ټولګي پورې به په رسمي ډول د هغوی ښوونځي پرانيستل شي.
د هغه په وینا په نږدې راتلونکې کې د ښوونیز نصاب بدلون لپاره کوم عملي اقدام په نظر کې نشته او په خپل وخت به د معمول مطابق د نصاب د تعدیل او غني کولو لپاره زمینه برابروي.
د طالبانو د پوهنې وزارت سرپرست د ښوونکو د معاشونو په اړه ويلي، چې د دوی له راتګ وروسته د استادانو د څو میاشتو معاشونه اجرا شوي او د پاتې میاشتو پر اجرا هم کار روان دی.
د طالبانو د خبرپاڼې له مخې، د ناروې سفیر د افغانستان د ښوونیز بهیر په برخه کې د هر ډول همکارۍ ډاډ ورکړی.
څو ورځې مخکې د طالبانو د حکومت وياند ذبيح الله مجاهد ويلي وو، چې په راتلونکي حمل مياشت کې به د نجونو ټول تړل شوي ښوونځي پرانيستل شي.
د هغه له دې څرګندونو هرکلی شوی و، خو د ملګرو ملتونو د بشري حقونو د برخې مشرې ویلي وو، چې د طالبانو پر داسې ژمنو باور نه شي کیدای.