تاند:( شنبه، د جدي اتلسمه) د افغانستان بريښنا شرکت وايي، چې د سره صلیب نړیوالې کمیټې نن له کندهار برېښنا سره د دوه سوه زره لیتره تېلو مرسته کړې ده.
د بریښنا شرکت د اعلامیې له مخې، سره صلیب( ICRC) دا مرسته د کندهار برېښنا ریاست سره د جنراتورونو چالانولو لپاره وکړه.
د کندهار برېښنا حوزې رئیس مولوي محمدحنیف حمزه د سره صلیب له مسئولینو سره په لیدنه کې يادې ادارې ته د کندهار برېښنا لخوا د یو لړ ضروري تخنیکي تجهیزاتو لیست هم سپارلی.
بریښنا شرکت وایي، چې د سره صليب مسؤلینو د تجهیزاتو د بشپړېدو ډاډ هم ورکړی او ژمنه يې کړې، چې د یادو تجهيزاتو له سپارلو سره به د کندهار برېښنا د ښاري شبکې په رغولو کې مرسته وکړي.
بريښنا شرکت نه دي ويلي، چې د سره صليب له لوري دا مرسته شوي تېل به ورسره کندهار ته د بريښنا په تولید کې څومره ګټور تمام شي؟
د طالبانو د واکمنۍ له پیل او د بشري او اقتصادي ناورين له شدت سره افغانستان د ګاونډيو هېوادونو له وارداتي برېښنا څخه په میلیونونه ډالره پوروړی دی.
د طالبانو د بريښنا وزارت چارواکو څه موده مخکې وویل، چې افغانستان به د بريښنا په یوه مهم صادراتي هېواد بدل کړي.