تاند:( شنبه، د جدي اتلسمه) د طالبانو د اسلامي امارت د بهرنیو چارو وزیر مولوي امیر خان متقي د ایران په رسمي بلنه نن دغه هېواد ته لاړ.
د طالبانو د بهرنيو چارو وزارت ویلي، چې په دې سفر کې له نوموړي سره د طالبانو د کابېنې د اقتصاد او سوداګرۍ وزيران هم ملګري دي.
د دغه سفر موخه پر دوه اړخیزو اړیکو خبرې ښودل شوي دي.
ايران په وروستيو کې په پرله پسې ډول، په افغانستان کې د ټول ګډونه حکومت د جوړیدو ټینګار کړی دی.
دغه سفر په داسې مهال دی، چې ويل کيږي د طالبانو پر ضد د مقاومت د عالي شورا يو مخکښ غړی حاجي محمد محقق هم په ایران کې دی.
محقق ايران ته د دغه سفر پر مهال له ایراني چارواکو سره د افغانستان د وضعیت او طالبانو سره د خپلو مخالفتونو په اړه خبرې کړي.
نوموړي ويلي، چې دوی د خبرو له لارې طالبانو سره د افغانستان د قضيې پر حل خبرو ته لومړيتوب ورکوي.
د افغانستان لپاره د ایران ځانګړي استازي ويلي وو، چې دوی د طالبانو او مخالفانو ترمنځ یې د سولې منځګړتوب ته چمتو دي.
طالبانو د محقق د څرګندونو په اړه غبرګون نه و ښودلی.