تاند: ( دوشنبه، د جدي ديارلسمه) د افغانستان په مختلفو ولايتونو کې د څو طبيعي، ترافيکي او امنیتي پېښو له کبله ۱۷ تنه وژل شوي او ۲۴ نور ټپيان شوي دي.
څو بېلابېلو سرچينو تاند ته ويلي، چې د کابل جلال آباد پر لویه لاره نن پینځه ترافیکي پېښې شوي، چې لس کسان پکې وژل شوي او ۱۵ نور ټپیان دي.
د بدخشان له راغستان ولسوالۍ څخه په راپورونو کې راغلي، چې د واوری ښوییدو له کبله د سرو زرو د یوه معادن ۵ کارکوونکي مړه شوي.
د هرات روغتیايي چارواکو ويلي، چې د هرات ښار او تورغنډۍ پر لاره د یوې ترافيکي پېښې په پایله کې ۱۳ تنه ټپيان شوي او سیمه ییز حوزوي روغتون ته لېږدول شوي دي.
د باميان د شیبر ولسوالۍ په دوه ترافيکي پېښو کې هم د يوه تن د مړینې او دوه تنو نورو د ټپي کیدو خبر ورکړل شوی.
د کابل ښار په یوولسمه ناحیه کې بیا نن سهار د طالبانو پر يوه رينجر موټر چاودنه شوې، چې ويل کيږي ۳ طالبان پکې ټپيان دي.
طالبانو په پېښه کې ځاني زيان نه دی تایید کړی.
د يادونې وړ ده، چې د نننيو ورښتونو له کبله د افغانستان د څو مرکزي او نورو ولايتونو: دايکندي، بامیان، غور، نورستان او هلمند او کندهار تر منځ لارې هم تړل شوي دي.