تاند: ( دوشنبه، د جدي ديارلسمه) راپورونه وايي، چې بلخ کې يوه ښځه او خاوند یې ناڅرګندو وسله والو د « اخلاقي فساد» په تور وژلي دي.
ځايي سرچینې وايي، چې دا پېښه د تېرې جمعې په ورځ د بلخ ولايت په مرکز مزارشريف ښار کې رامنځته شوې ده.
ځايي خلکو ويلي، چې وژل شوې مېرمنې ته طالبانو يو اخطار لیک ورکړی او هغه یې په « اخلاقي فساد» تورنه کړې وه.
د بلخ د ابو علي سينا روغتون مسوولينو منلې، چې د يوه وژل شوي نارینه جسد او يوه ټپي مېرمنه دغه روغتون ته وړل شوي وو.
ويل شوي، چې دواړه کسان په ډزو ويشتل شوي وو، چې ټپي مېرمنه هم وروسته د ژورو ټپونو له کبله مړه شوې ده.
په بلخ کې د طالبانو ځايي چارواکو په دې اړه څه نه دي ويلي.
څه موده مخکې د طالبانو د سترې محکمې مشر له دوی غوښتي وو، چې له صحرايي محکمو ډډه وکړي او مخه يې ونيسي.