تاند:( یکشنبه، د جدي دولسمه) د تخار ولايت په مرکز تالقان ښار کې د طالبانو د امر بالمعروف او نهی عن المنکر ادارې یو ۷۵ کلن سپين ږيری او يو ځوان سړی په دې تور په سیند کې غوپه کړي، چې ويل کيږي د لمانځه لپاره جومات ته نه وو ورغلي.
ځايي خلکو ويلي، چې دغه دواړه کسان په سیند کې د غوپه کیدو له کبله ټپیان شوي دي.
راپورونه وايي، چې هلته د سهار او ماسخوتن لمانځه ته په جومات کې د نه حاضرېدو له کبله امر بالمعروف ادارې ۲۰۰ افغانۍ جریمه هم وضع کړې ده.
د طالبانو ځايي چارواکو په دې اړه رسنيو ته وضاحت نه دی ورکړی.
په وروستيو ورځو کې له کابل څخه هم د طالبانو د يادې ادارې د کارکوونکو ځينې ویډیو ګانې خپرې شوي، چې پکې موټر چلوونکي د ودرولو او په جمعه د لمونځ کولو تر څنګ د دوی له نورو اوامرو خبرول کیږي.