تاند: ( چار شنبه، د جدي اتمه) په کابل کې لسګونه مظاهره چیانو، چې د ګذر وکيلانو يې مشري کوله، له امریکا متحده ایالاتو څخه د افغانستان د کنګل شوې بانکي زېرمې د خلاصون او نورو هېوادونو څخه د طالبانو د حکومت د په رسميت پېژندلو غوښتنه وکړه.
په دې لاريون کې يو شمېر ښځينه وو هم برخه لرله او ټینګار یې کاوه، چې د افغانستان د اوسنيو اقتصادي ستونزو د حل لپاره باید د طالبانو حکومت سره مرسته وشي.
د ننني لاريون د امنيت لپاره طالبانو پر دارالامان سړک کلک تدابير نيولي وو.
د پروني لاريون پر مهال، چې ښځينه وو د خپلو سلب شویو حقونو د ترلاسه کولو لپاره تر سره کړی و، طالبانو ورته ورغلي يو شمېر خبریالان بندیان او د مظاهره چیانو پر لور ډزې وکړې.
طالبان تورن دي، چې د خپلو پلويانو او مخالفانو پر وړاندې دوه ګونی چلند کوي.
د طالبانو وياندويانو په خپلو خواله رسنيو کې د دغه لاريون عکسونه او ویډیوګانې خپرې او لیکلي، چې ښځو د دوی او غوښتنو په پلوۍ یې لاریون کړی.
منتقدین یې بیا وايي، چې طالبان ښځو ته د زده کړو، دندو او حتا ډاکترانو ته له نارینه محرم پرته د ورتلو اجازه نه ورکوي، خو په خپله پلوۍ یې مظاهرو ته، هغه هم په ډېر ګومان په جبري ډول را باسي.
طالبانو بيا دغو نیوکو ته غبرګون نه دی ښودلی.