تاند:( سې شنبه، د جدي اوومه) د طالبانو کورنیو چارو وزارت وايي، چې د دغه وزارت د سرپرست وزیر سراج الدین حقاني په لارښوونه د پلچرخي له زندانه لس ناروغ او عمر خوړلي بندیان آزاد شول.
وزارت د حقاني په حواله وايي چې شر جوړونکي دهېواد او ولس د بې ثباتۍ لامل کېږي او طالبان. مکلف دی چې هغوی دشریعت په رڼا او دحدودو په آډانه کې مجازات او توقیف او ټولنه یې له شره خلاصه کړي.
د دغو بنديانو په اړه نور جزییات نه دي ورکړل شوي.
د کابل د څرخي پله زندان په زرګونو بنديان د تېرې اګسټ مياشتې په پینځلسمه يانې هغه ورځ، چې طالبان پر کابل حاکم شول، له زندانه ووتل.
معلومه نه ده، چې خوشې شوي بنديان پخوا بندیان شوي او که د طالبانو د واکمنۍ پر مهال بنديان شوي وو.
د هغوی د جرمونو او نورو ځانګړنو په اړه څه نه دي ویل شوي.
د جمهوري نظام په وروستيو کې د افغانستان د زندانونو د تنظيم ملي او ملکي اداره جوړه شوې او د ټولو زندانونو واګې ورته سپارل شوې وې، خو د طالبانو له واکمنیدو سره زندانونه بيرته د کورنيو چارو وزارت اړوند شوي دي.