تاند:( دوشنبه، د جدي شپږمه) ‏‏د طالبانو د بهرنیو چارو وزارت سیاسي مرستیال شېر محمد عباس ستانکزي ادعا کړې، چې طالبانو په افغانستان کې امریکا او ټولو نړیوالو متحدینو ته یې ماتې ورکړې او له دې سره د نړۍ په يوازيني زبرځواک بدل شوي.

نوموړي په لوګر کې پر افغانستان د پخواني شوروي اتحاد د يرغل ( مرغومې ۶مې) په مناسبت جوړې شوې غونډې ته وویل، «امریکایانو ته مې مخامخ وویل چې نړۍ کې دوه سوپر طاقتونه دي، یو تاسې یاست او بل موږ یو، ځکه سره وهو، ګورو به چې څوک یې ګټي، الحمدلله موږ وګټله او هغوی ماتې وخوړه.»

ستانکزي دا څرګندونې په داسې مهال کړي، چې پرون یې له امریکا څخه د دوی د نه په رسميت پېژندلو له کبله ګیله وکړه او ويې ويل، چې په دې برخه کې ظلم او بې انصافي ورسره کیږي.

د طالبانو دغه لوړپوړي سياسي مقام مخکې له دې هیله مندي ښودلې وه، چې امريکا به یې حکومت ژر په رسميت وپېژني.

شېرمحمد عباس ستانکزي ويلي وو:« امريکا به ژر انشالله په افغانستان کې خپل سفارت بیرته پرانیزي».

نوموړي دغه راز له امریکا غوښتي وو، چې افغانستان ته له پوځي حضور پرته د اقتصادي اهدافو او افغانستان ته د مرستې او همکارۍ په نيت بیرته راوګرځي.

د ستانکزي ضد و نقيضې څرګندونې د خلکو له نیوکو سره مخ شوي دي.

هغه په يوه بله وینا کې امريکا ته خبرداری ورکړی و، چې ۴۰ کاله نوره جګړه به ورسره وکړي.

د طالبانو يو شمېر منتقدینو بیا هغه ته په خطاب کې ویلي و، چې د څلور میاشتینۍ واکمنۍ پر مهال يې ۲۴ میليونه افغانان وږي شوي، ډوډۍ نه لري او له لوږې ځانونه وژني.