تاند:( يکشنبه، د جدي پینځمه) په ننګرهار کې د فوټبال ۱۶ ورځنۍ سيالۍ پیل شوې.
د ننګرهار ولایت مقام په يوه اعلاميه کې راغلي، چې دغه سيالۍ د دې ولايت د مرکز جلال اباد ښار کې د فوټبال لس غوره لوبډلو ترمنځ پیل شوې، چې په ترڅ کې به يې د کال غوره لوبډله انتخاب شي.
د دې سيالۍ په لومړۍ ورځ ننګرهار او اتحاد لوبډلو سيالي وکړه چې ننګرهار لوبډلې وګټله.
د يادو سياليو پر مهال د ننګرهار بدني روزنې رئیس نور احمد حبيبي، چې د فوټبال فدراسيون رئيس عفيف رنجبر هم حضور درلود له مسئولینو وغوښتل چې د سياليو پر مهال له عدالت کار واخلي او غوره لوبغاړو ته خپل حق ورکړي.
دا په داسې حال کې ده، چې د طالبانو له واکمنیدو سره د افغانستان ورزشي فعالیتونه هم ډېر کمرنګه شوي او عمده دليل يې اقتصادي ستونزې او د ورزش د اړوندو ادارو فلج کیدل ګڼل کېږي.
څه موده مخکې د المپيک نړيوالې کميټې له شاوخوا پینځه سوه افغان لوبغاړو سره د څه باندې نیم میلیونه امریکايي ډالرو مرسته اعلان کړه، څو د بشري او اقتصادي ناورين پر وړاندې مقابله کې ورسره مرسته وشي.
افغان لوبغاړي او ورزش پوهان وېره لري، چې د اوسني وضعيت له دوام سره به د نورو برخو تر څنګ د افغانستان ورزش هم سقوط او لاسته راوړنې يې نابودې شي.
د طالبانو لخوا د ورزشي ادارو لپاره ټاکل شوي چارواکي بيا ډاډ ورکوي، چې ورزشي فعاليتونو ته به پوره پاملرنه وکړي او لاسته راوړنې به دوام ولري.