تاند:( جمعه، د جدي درېيمه) د طالبانو کابینې په يوه تازه پريکړه کې د افغانستان د ټاکنو اړوند دوه کميسونونه لغوه کړي.

د دغو کميسيونونو ترڅنګ د بې واکه شوي ولسمشر د مشاورينو تشکيلاتو او سولې او پارلماني چارو د وزارتونو د لغوه کیدو خبر هم ورکړل شوی.

د‌ دې ترڅنګ د بشري حقونو د کمیسیون د نوم بدلېدو او نوي جوړښت پریکړه شوې.

د دې کميسونونو له لغوه کیدو سره طالبانو په خاموشه توګه د ټاکنو د نه ترسره کیدو پریکړه کړې ده.

د افغانستان د تېرو شلو کلونو نظام يوه عمده لاسته راوړنه د ټاکنو له لارې د واک د برخليک ټاکل کیدل وو.

 ټاکنيز بهير سره له دې، چې په افغانستان کې له درغليو ډک و او پايلې يې د توقع خلاف ګڼل کيدې، خو د افغانستان د نظام د مشروعیت اساس و.

د ټاکنو خپلواک کميسيون او د ټاکنيزو شکایتونو کمیسیون په داسې مهال لغوه کيږي، چې د دغو کميسيونونو منسوبينو له تېرو څو مياشتو راهيسې معاشونه نه دي ترلاسه کړی او سختو ستونزو سره مخامخ دي.