تاند:( جمعه، د جدي درېيمه)ترکیه وايي، چې د ثناء الله غفاري په نوم د هغه افغان وګړي شتمنۍ يې کنګل کړي، چې په افغانستان کې د داعش ډلې مشر دی.
دغه کس د داعش ډلې د خراسان ځانګې پر مشرۍ سربېره له القاعده شبکې سره هم په اړيکو تورن دی.
د ترکيې د خزانې او شتمنۍ وزارت ویلي، چې دا اقدام یې د ملګرو ملتونو د نړيوال بندیزونو په تور ليست کې د غفاري له نوم شاملیدو وروسته کړی.
غفاري، چې په ۱۹۹۴ کې زيږيدلی د کابل ولايت اصلي اوسيدونکی دی او مخکې يې د بې واکه شوي ولسمشر اشرف غني د لومړي مرستيال امر الله صالح د ساتونکي په توګه هم دنده ترسره کړې.
صالح ویلي، چې پر دغه کس د حقاني شبکې غړيتوب هم ثابت شوی و.
ترکېې هغه ته تر دوه میاشتو د دغې پریکړې په اړه د اعتراض حق ورکړی.
څرګنده نه ده، چې غفاري په ترکيه او نورو هېوادونو کې څومره شتمنۍ لري؟