تاند:( جمعه ، د قوس شپږ ویشتمه)‏‏‏‏ په کابل کې د پاکستان سفير منصور احمد خان، چې منتقدان یې د سفیر پر ځای د افغانستان ټولواک او د طالبانو د نفوذي رژيم اصلي ټولواک ګڼي، پرون یې د روسیې او ترکیې له سفیرانو سره په خپل دفتر کې وکتل.

منصور احمد خان د دغو سفیرانو د جلا- جلا ورتلو عکسونه پر خپل ټویټر خپاره کړي او لیکلي، چې له افغانستان سره د همکارۍ او په ځانګړي ډول د بشري مرستو، په دې برخه کې د سیمه ییزو او نړیوالو همغږیو په پياوړتيا او سیمه ییز ثبات قوی کولو سره غږيدلي دي.

منصور احمد خان تر دې مخکې هره ورځ د طالبانو ګڼ لوړپوړي چارواکي ورغوښتل، چې ډ منتقدینو په وینا خپل حکمونه یې ورسره شریکول او د اجراآتو راپور یې ترې غوښت.

په دې اړه خپریدونکو عکسونو کې لیدل کیدل، چې پاکستانی سفیر د یوه ټولواک او امپراتور او طالب چارواکي یې د معدونانو په توګه ناست دي.

د دغو لیدنو په اړه په ټولنیزو رسنیو کې افغانانو توند غبرګونونه وښودل او منصور احمد خان یې د انګرېزي امپراتورۍ له وايسرای ګانو سره تشبيه کړ.

وايسرای د استعمار هغه ټولواکه استازي ته ویل کېده، چې په یرغمل شوي هېواد کې یې لاسپوڅی حکومت رهبري کاوه او ټولې واګې او پریکړې به هماغه سره وې.

طالبانو د ولسي فشارونو له کبله پر خپلو چارواکو حتمي کړه، چې د بهرنيو چارو وزارت له همغږۍ پرته به یې بهرني ديپلوماتان نه ویني.

له دې سره ویل کېږي، چې منصور احمد خان اوس هم د خپلې ټولواکۍ یا وايسرای توب رول ته هماغسې دوام ورکوي، خو تصویرونه یې نه رسنيز کیږي.

د افغانستان د پخواني مرستيال ولسمشر امرالله صالح په ګډون ډېر افغانان پاکستان تورنوي، چې افغانستان یې د طالبانو په لاس اشغال کړی، خو طالبان او پاکستان دغه خبره ردوي.