تاند:( چار شنبه ، د قوس څلور ویشتمه) د ملګرو ملتونو نړیوال سازمان د یوه راپور له خپرولو سره ویلي، چې په افغانستان کې د طالبانو له واکمنیدو سره لږ تر لږه ۱۰۰ تنه په هدفي ډول وژل شوي، چې د ۷۲ تنو د وژنې مسوولیت یې خپله طالبانو ته ور ګرځي.
د ملګرو ملتونو د بشري حقونو د کمیسارۍ مرستیال نادا النشیف ویلي، چې د دې ترڅنګ ۵۰ تنه د طالبانو له لوري داعش سره د تړاو په نوم هم وژل شوي.
نوموړي زیاته کړې، چې د سلو هدفي وژنو ۷۲ یې پر طالبانو تاوان دي، ځکه د دغو کسانو اکثره یې د دوی مخالفان وو او له وژل کیدو وروسته یې جسدونه په عام محضر کې د وحشت خپرولو په موخه ځړول شوي او بشري حقونه نقض شوي.
سرچینې زیاته کړې، چې د طالبانو له واکمنیدو سره ۸ تنه افغان فعالان او ۲ خبریالان هم وژل شوي.
د دې ترڅنګ، دغه سازمان د طالبانو له لوری د ۵۲ تنو ناقانونه نیول کیدل هم مستند کړي دي.
یاد شوي نړیوال مقام په ورته وخت کې د طالبانو واکمني د ناقانونه وژنو او د ښځو او نجونو د لومړنیو حقونو د محدودولو واکمني ګڼلې.
هغه په له لوږې ډک ژمي کې د مجبوریو له زیاتیدو سره د نورو کم عمره نجونو د پلورل کیدو او ودیدو اندیښنه هم ښودلې.
سربېره پردې ملګرو ملتونو د پخوانیو افغان قاضیانو، څارنوالانو، مدافع وکیلانو او په خاص ډول په دې برخو کې د ښځینه کارکوونکو د امنیت په تړاو اندیښنه ښودلې.
بل لور ته په ژنیو کې د افغانستان د پرځول شوي جمهوري نظام استازي نصیراحمد اندیشه ویلي، چې د طالبانو هدفي وژنې او د بشري حقونو نقض تر دې ډېر پراخ دی، چې نړیوالې ادارې یې اعلانوي.
د هغه په باور، دغې ډلې تر دې خورا زیات جنایتونه کړي، خو د قیوداتو او شدید سانسور له کبله یې مستند سازي نه ده شوې او په ډېرو پېښو او جنایتونو خلک چوپ پاتې شوي.
طالبانو د ملګرو ملتونو دغه تازه راپور ته کوم غبرګون نه دی ښودلی.
مخکې د طالبانو رییس الوزرا مولوي محمد حسن اخوند د بشري او ښځینه حقونو د نقض له پلوه پر دوی تورونه رد کړي وو.
د طالبانو د سیاسي دفتر ویاند ډاکټر محمد نعیم وردګ خو لا دا هم ویلي، چې د بشري حقونو په تامین کې دوی تر ټولې نړۍ مخکې دي او چمتو دي چې د بشري حقونو د تامین په اړه نړیوالو ته د زده کړې ورکشاپونه هم ورکړي.
تاسی بی وجدانه دا 20 کاله چیرته وی چی په افغانستان کی د ورځی په سلهاو هدفی وژنی کیدلی
حبيبب خانه تر څو چېې دا مردار خواره ورک نشي سوله نه راځی