تاند:(یکشنبه، د قوس يو ويشتمه) برتانیا ویلي، چې له افغانستان سره د ۷۵ میلیونه پونډو، چې نیږدې ۱۰۰ میلیونه ډالره کیږي، بشري مرسته کوي.
د برتانیا د بهرنیو چارو وزارت ویلي، چې له دې مرستو څخه ۳۴ میلیونه پونډه د نړیوال خوراکي پروګرام له لارې ترسره کیږي.
دا مرسته د اوو صنعي هېوادونو د بهرنیو چارو وزیرانو له ګډې غونډې وروسته اعلان شوې ده.
په دې ناسته کې د نورو موضوعاتو ترڅنګ د افغانستان د وضعیت په اړه خبرې شوي.
د برتانیا بهرنیو چارو وزیر ویلي، چې د افغانستان په اړه د اوو صنعتي هېوادونو له دریځ څخه خوښ دی.
هغه ټينګار کړی چې له افغانستان سره باید مرستې زیاتې او د بشري ناورین مخنیوی یې وشي، څو د نورو ستونزو د مخنیوي ترڅنګ د کډوالۍ بحران د پراختیا ممانعت شوی وي.
د ملګرو ملتونو په حواله، د افغانستان تر ۲۴ میلیونو پورې خلک سخت وږي دي او ډوډۍ نه لري، چې ممکن یوه برخه یې د فقر له کبله تلف هم شي.
طالبانو بیا د ملګرو ملتونو او نورو نړیوالو بنسټونو ارقام او خبرداري په دې اړه رد کړي او رسنیز تبلیغات ګڼلي، خو په دې برخه کې یې د خپل اصلي ملاتړي او مدافع هېواد( پاکستان) د صدراعظم او نورو چارواکو خبرداریو ته چې وایي افغانستان کې بشري فاجعه روانه ده، غبرګون نه دی ښودلی.