تاند:( جمعه ، د قوس نولسمه)د طالبانو حکومت دا ځل د دولتي مامورينو د دوه مياشتينيو معاشونو د ورکړې ادعا کړې ده.
د طالبانو د حکومت يوه وياند احمد الله وثیق دغه ادعا نن پر خپلې ټویټر پاڼې کړې ده.
هغه ليکلي :(( ډیر خوشحاله یم حکومت خپله وعده پوره کړه، مامورینو ته د دوو مياشتو د معاشاتو د ورکړې بهیر پيل شو. ))
ښاغلی وثیق زياتوي:(( تیره ورځ د راډيو ټلويزيون مامورينو ته وويل شول،معاشات مو اکاونټونو ته حواله شوي د بانک له لارې يې واخلئ.))
احمد الله وثیق په دې اړه نور جزییات نه دي ورکړي.
طالبان په وروستيو کې، بيا- بیا د دولتي کارکوونکو د معاشونو د ورکړې ادعاوې کوي، خو په نه عملي کولو يې باور ته زيان رسيدلی.
په ملګرو ملتونو کې د طالبانو د استازیتوب لپاره ټاکل شوي خو رد شوي سفیر سهیل شاهین اوړمه ورځ په يوه مرکه کې ادعا وکړه، چې د دوی ادارې د افغانستان ټولو دولتي کارکوونکو ته درې میاشتیني معاشونه ورکړي دي.
په ټولنیزو رسنیو کې دولتي کارکوونکي دوی ته د بیا- بیا ژمنو پر خلاف د معاشونو له نه ورکول کیدو شکایت لري.
د مالیې وزارت یوې سرچینې د نوم نه خپرولو په شرط پرون تاند ته وويل، چې طالبانو له لسګونه دولتي ادارو څخه یوازې د دغه وزارت کارکوونکو ته د یوې میاشتې معاش، هغه هم د طالب مشرانو لخوا د نوي وضع شوي نورم له مخې ورکړی، چې مامورینو ته ملاماتونکی او ډېر ناڅيزه دی.
شاوخوا یوه مایشت وړاندې د طالبانو مالیې وزارت د دولتي کارکوونکو د درې میاشتې معاشونو د یو ځای ورکړې اعلان وکړ، خو دوه اونۍ مخکې دغه اعلان له درېیو میاشتو څخه د دوه میاشتې معاشونو د ورکړې اعلان ته راښکته شو.
له دې سره هم دولتي کارکوونکي وایي، چې څلورمه میاشت یې په پوره کیدو ده،خو طالبانو د یوې میاشتې معاش هم نه دی ورکړی.
د یادونې وړ ده، چې طالبانو د خپلې واکمنۍ له پيله د دولتي کارکوونکو معاشونه هم د نوي نورم په اساس تنظیم کړي، چې ډېرو برخو کې تر نیمایي هم معاشونه کم شوي او مامورین یې د دوی د اړتیاوو د پوره کولو لپاره بسندوی نه ګڼي.