تاند:( جمعه ، د قوس نولسمه) د کابل په لويديځ کې نن ناوخته ۲ چاودنې شوي.
د طالبانو د کورنيو چارو وزارت وياند قاري سعید خوستي د دغو چاودنو د تايید تر څنګ ويلي، چې په ترڅ کې یې ۲ تنه وژل شوي او ۴ نور ټپيان دي.
د هغه په وينا لومړۍ چاودنه په دشت برچي سيمه کې شوې، چې ۲ تنه يې وژلي او ۳ تنه پکې ټپيان دي.
دویمه چاودنه هم د کابل په لويديځ کې د علي مزاري څلور لارې ته نيږدې شوې، چې د سعيد خوستي په وينا يوه مېرمنه پکې ټپي شوې ده.
سعيد خوستي د چادونو څرنګوالی او هدفونه نه دي په ډاګه کړي، خو ويلي چې د دواړو په ترڅ کې ملکیانو ته مرګ ژوبله اوښتې ده.
خپلواکو سرچینو تراوسه د طالبانو د وياند خبرې تاييد یا رد کړي نه دي.
د چاودنو مسوولیت هم چا پر غاړه نه دی اخیستی.
د طالبانو له واکمنیدو وروسته، د کابل په لويديځ کې د ورته څو پېښو مسووليت داعش ډلې پر غاړه اخيستی و.
په وروستيو ورځو کې له کابل څخه د یو شمېر امنیتي پېښو خبرونه ورکول کيږي، خو طالبان یې د جزییاتو په پټولو او رسنیز سانسور تورنيږي.