تاند:( چارشنبه ، د قوس اوولسمه)د ملي جنبش ګوند د مشر عبدالرشيد دوستم اړوند آيينه ټلویزیون، چې د طالبانو له واکمنیدو سره يې نشرات دريدلي وو، پرون يې بيرته نشرات پيل کړل.
په دې اړه د ياد شوي ټلويزيون په راپور کې راغلي، چې په نوې بڼه به خپل نشرات تر سره کړي.
سرچينې له نوې بڼې څخه خپل هدف نه دی څرګند کړی.
د ټلویزیون په اړوند راپور کې د دوستم او ملي جنبش ګوند کومه يادونه نه ده شوې او نه يې د پخوا په شان د عکس يا ګوندي بیرغ کوم څرک معلومیږي.
د دې پر ځای د آئينه ټلویزیون لوحه په پرله پسې توګه ښيي، چې د طالبانو سپین بیرغونه ورسره ځړول شوي دي.
د ټلویزیون ویاند ویلي، چې خپلو نشراتو ته به د پخوا په شان په پیاوړي ډول دوام ورکړي، خو بڼه به یې نوې وي.
په دې اړه په راپور کې د ټلویزیون د کوم مسوول نظر نه دی خپور شوی او نه معلوميږي، چې د ټلویزیون مشري اوس د دوستم پلویانو که د طالبانو له اړوندو کسانو سره ده؟
طالبانو د دوستم کور او د ټلويزيون دفتر یې چې د کابل په شېرپور سیمه کې سره څنګ په څنګ دي، د دوی له واکمنیدو سره قبضه کړي دي.
مخکې د دغه کور او اړوندو ملحقاتو د لیلام اوازه هم وه، خو داسې ښکاري چې طالبانو ورسره د زياتيدونکو تقابلونو د مخنيوي لپاره دغه کار نه لاس اخيستی.
د دوستم پلویانو د آئينه ټلویزیون د نشراتو د پیل په اړه تر اوسه څه نه دي ويلي.
څه موده مخکې د زاویه میډیا په نوم نشراتي شبکې، چې د جمهوري نظام د ملي امنيت د سلاکار حمد الله محب اړوند ګڼل کېده، ادعا وکړه چې د طالبانو له واکمنیدو سره، حقاني شبکې د دغې شبکې واګې په لاس کې نيولې او پخپله ګټه نشرات ورڅخه کول.
د يادې شبکې له ټولنیزو رسنیو څخه د انس حقاني یو شمېر عکسونه هم خپاره شوي وو، چې د زاویه میډیا له دفتر څخه یې لیدنه کوله.
معلومه نه ده، چې آئينه ټلویزیون خو به د زاويه ميډيا له ادعا شوي برخليک سره نه وي مخامخ شوی؟