تاند:( سې شنبه، د قوس شپاړسمه)‏‏‏ د افغانستان د بې واکه شوي ولسمشر محمد اشرف غني لومړي مرستيال امرالله صالح ادعا کړې، چې د افغانستان له نړیوال بانک پرته نور ټول بانکونه سقوط شوي دي.

نوموړي نن پر خپلې ټویټر پاڼې لیکلي، چې د افغانستان له نړیوال بانکAIB پرته نور ټول سقوط شوي او د خپلو مسوولیتونو د ترسره کولو وړتيا نه لري.

د هغه په وينا، طالبانو په خاموشه توګه د ټولو بانکونو واګې په لاس کې نیولي او شتمنۍ يې غصب کړي دي.

د امرالله صالح د معلوماتو له مخې، د بانکونو مالکان او مديران د طالبانو د شکنجې، اختطاف او غیر انساني چلند له وېرې له هېواده تښتیدلي دي.

مخکيني مرستيال ولسمشر پر پاکستان غږ وکړ، چې د ده په خبره د خپلو طالب لاسپوڅو د ژغورلو لپاره لاس په کار او د پيسو مرسته ورسره وکړي.

د ده په خبره، چې د طالبانو واکمنۍ سره د اونۍ اووه لارۍ د غنمو مرسته د حل لاره نه ده.

صالح پاکستان ته خبرداری ورکړی، چې د افغانستان هضمول او له ستوني تېرول ورته نا ممکنه دی.

د صالح په وينا، د افغانستان اوسنی وضعیت یې د دې خبرې ښکاره مثال دی.

طالبانو د صالح څرګندونو ته غبرګون نه دی ښودلی.

پرون د افغانستان د ميوند خصوصي بانک د سقوط خبر ورکړل شو، خو رسمي سرچينو دا خبره نه ده تایید کړې.

له تېرو څو ورځو راهيسې د ډالرو پر وړاندې د افغانيو بيه په بېساري ډول پريوتې، چې د خوراکي توکيو بيې هم ورسره خورا لوړې شوي دي.