تاند:( دوشنبه، د قوس پینځلسمه) په کابل کې د امريکا متحده ايالاتو يوه پخواني سفير هوگو لارنس اعتراف وکړ، چې هېواد يې له افغانانو سره خیانت وکړ.
نوموړي په يوه تازه مرکه کې وويل، چې دغه خیانت له افغانستان څخه د امریکايي سرتیرو په نا مسوولانه وتو سره وشو.
د دغه پخواني امريکايي سفير په خبره، امريکا په دا ډول وتو سره هغه ژمنې نقض کړې، چې د افغانستان له خلکو سره یې کړې وې.
سفير هوگو لارنس دا هم ويلي، چې دا هر څه د پخواني ولسمشر ډونالډ ټرمپ او اوسني ولسمشر جوبایډن د غلطو پریکړو له کبله وشول.
امريکايي چارواکي له افغانستان څخه د نا مسوولانه وتو په اړه په کور دننه هم له توندو غبرګونونو سره مخامخ دي.
د امريکا د دفاع وزیر اوړمه ورځ له فاکس نيوز ټلويزيوني شبکې سره د مرکې پر مهال له افغانستان څخه د همدغه نا مسوولانه وتو له کبله د خبريال پوښتنې ته بې ځوابه شو او په دغه ډول وتو یې پښېماني وښوده.
افغانان هم امريکا، له طالبانو سره د پټو معاملو په سبب د خپل ۲۰ کلن جمهوري نظام په سقوط او د لاسته راوړنو په له منځه وړلو تورنوي، خو امريکايي چارواکي بيا د ځان په دفاع سره پړه پر مخکینيو افغان چارواکو اچوي.