تاند:( شنبه، د قوس ديارلسمه)د افغانستان د حزب وحدت مردم ګوند مشر محمد محقق په یوه تازه پيغام کې طالبان د عمومي عفوې د اعلان باوجود هم د مخکینیو پوځي منسوبینو په شکنجې کولو او وژلو تورن کړي دي.
نوموړي پر خپلې فیسبوک پاڼې لیکلي، چې طالبانو تازه د نوید خان ازادي او محمد علي کربلایي په نوم دوه هزاره پوځي منسوبین وژلي.
د ده په وینا، ازادي په کندوز او کربلایي په دایکندي کې د طالبانو له شکنجې څخه وروسته وژل شوي دي.
د ده په خبره، یاد شوي کسان له څه مودې د طالبانو لخوا بندیان وو، چې اوس د شکنجو له کبله مړه شوي او جسدونه یې کورنیو ته په لاس ورغلي.
طالب چارواکو په دې اړه کوم غبرګون نه دی ښودلی.
څو ورځې مخکې د بشري حقونو د څار نړیوال سازمان وویل، چې طالبانو یوازې په غزني، هلمند، کندهار او کندوز ولایتونو کې د خپلې واکمنۍ په لومړیو دوه نیمو میاشتو کې تر سلو ډېر مخکیني پوځي منسوبین وژلي یا لادرکه کړي دي.
محقق له طالب چارواکو غوښتي، چې د عمومي عفوې اعلان ته ژمن پاتې شي.
طالبانو د بشري حقونو د څار نړیوال سازمان ته هم کوم غبرګون نه دی ښودلی.
د طالبانو یو شمېر منتقدین دوی تورنوي، چې له مخکیني نظام سره د تړاو په تور یې تراوسه په زرګونه کسان وژلي، خو دا موضوعات د بیان او رسنیزې ازادۍ د نشتوالي له کبله ډېر نه رسنیز کیږي.
ښه خبره يى کړيده ښاغلى ميخکوب