تاند:( پنجشنبه، د قوس څلورمه) د افغانستان د کرکټ بورډ سرپرست رئیس میرویس اشرف ویلي، چې د افغانستان د کرکټ ښځینه لوبډله به د پخوا په څېر خپل فعالیت ته دوام ورکوي.
نوموړي پرون د بورډ د مدیره پلاوي په غونډه کې ویلي، چې د ښځینه کرکټ لوبغاړو د فعالیت دوام د کرکټ نړیوالې شورا یو مهم شرط دی.
د ده په خبره، دوی هڅه کوي، چې د دغه فعالیت د دوام لپاره ښځینه لوبغاړو ته لازم امکانات برابر کړي.
هغه د کرکټ بورډ مسوولینو ته وویل، چې له نړیوالې کرکټ شورا سره خپلو اړیکو ته دوام ورکړي او اصول یې باید په ښه ډول عملي کړای شي.
څه موده مخکې د طالبانو یوه ویاند احمدالله وثیق ویلي و، چې دوی به ښځینه کرکټ لوبغاړو ته له دې کبله د لوبو اجازه ورنه کړي، چې په دې لوبه کې یې حجاب نه مراعتیږي، د وجود ځينې برخې یې ښکاري او لوبې یې له ټلویزونونو خپریږي.
د طالبانو له دغو څرګندونو وروسته، د کرکټ نړیوالې شورا خبرداری ورکړ چې که طالبان پر افغان کرکټ بورډ قیودات ولګوي، دوی به له افغان کرکټ سره پر اړیکو بیا کتنه وکړي.