تاند:( سې شنبه، د قوس دويمه) د افغانستان د خصوصي پوهنتونونو ټولنه اندیښنه لري، چې د روان بشري او اقتصادي ناورین له دوام سره به خصوصي پوهنتونونه تر راتلونکو شپږو میاشتو پورې سقوط شي.
د دغې ټولنې رئیس احمد کمال طارق ویلي، چې د خصوصي پوهنتونونو زیاتو محصلینو د فقر له کبله پوهنتونونه پریښي او د فیس ورکولو وس نه لري.
د ده په وینا، د دې وضعیت له دوام سره به تر شپږو میاشتو ډېر خصوصي پوهنتونونه دوام ونه کړای شي.
د مورا په نوم د ځانګړي ښځینه پوهنتون رئیس ډاکټر عزیزالله امیر بیا وویل، چې د دوی د محصلینو کچه تر ۷۰ سلنې پورې را کمه شوې ده.
هغه اندیښمن دی، چې که وضعیت زر بدل نه شي، د ډېرو خصوصي پوهنتونونو دروازې به وتړل شي.
په ننګرهار کې د الفلاح پوهنتون رئیس ډاکټر معشوق سادات هم د محصلینو د کمیدو خبر ورکړی او ویلي، چې د فیسونو د کمولو باوجود د دوی د محصلینو کچه تر ۲۵ سلنې راکمه شوې ده.
د طالبانو له واکمنیدو مخکې افغانستان ۱۳۰ خصوصي پوهنتونونه لرل.
دغو پوهنتونونو ۲۴ الحاقیې، ۲۱۰ زره محصلین او ۲۵ زره تدریسي او اداري کارکوونکي لرل او د ټولو زده کوونکو ۳۰ سلنه یې ښځینه وې.
د خصوصي پوهنتونونو او نورو زده کړو په برخه کې افغانستان په لسګونه میلیونه ډالره پانګونه کړې، چې اوس دا ټول د نابودۍله خطر سره مخامخ دي.
طالبانو په دې اړه څه نه دي ویلي، چې د دغو پوهنتونونو د ژغورلو لپاره به څه کوي؟
یاد شوي راپورونه په داسې مهال دي، چې طالب حکومت تراوسه د نورو دولتي کارکوونکو په شان د دولتي پوهنتونونو استادانو ته هم پر خپل وخت معاشونه نه دي ورکړي.