تاند:( سې شنبه، د قوس دويمه) د افغان – جاپان روغتون چارواکي د معاشونو د ځنډ ترڅنګ په روغتون کې د ټولو درملو او طبي تجهیزاتو د پای ته رسیدو خبر ورکوي.
د دغه روغتون سرطبیب طارق احمد اکبري وایي، د روغتون یوه کارکوونکي پسې یې له دې کبله د کرایي کور مالک روغتون ته امنیتي ځواکونه راوستي وو، چې ولې یې د کور کرایه ډېره موده ځنډولې ده.
د اکبري په خبره، ۴ میاشتې کیږي چې د دوی کارکوونکو ته معاشونه نه دي ورکړل شوي.
د یاد شوي روغتون سرطبیب د خپل یوه بل کارکوونکي کیسه هم کوي او وایي، چې د کور مالک یې د کور ځینې وسایل د کرایې د نه ورکولو له کبله وړي او ایسار کړي.
د اکبري د معلوماتو له مخې ډېری کارکوونکی یې ان روغتون ته د راتلو کرایه نه لري.
نوموړی په ورته وخت کې وایي، چې روغتون ورځ تربلې له هر ډول طبي وسایلو او درملو بې برخې کیږي او اندیښمن دي، چې که د کرونا ویروس خپریدل بیا زیات شي، د ناروغانو برخلیک به څنګه شي؟
افغان – جاپان روغتون په افغانستان کې د کرونا ویروس د ناروغانو ددرملنې تر ټولو ستر روغتون دی.
د دغه ویروس د ناروغانو د درملنې د لسګونه مرکزونو په ګډون سلګونه روغتیایي مرکزونه، چې نړیوالو بنسټونو یې مالي او تخنیکي ملاتړ کاوه، د طالبانو له واکمنیدو سره د امکاناتو د نشتوالي په دلیل تړل شوي دي.
دا په داسې حال کې ده، چې د طالبانو د عامې روغتیا وزارت چارواکي د رسنیو پر مخ بیا- بیا د یادو ستونزو د حل خبر ورکوي.
نړیوالو بنسټونو ګواښ کړی، چې که افغانستان کې روان وضعیت دوام وکړي، د نورو برخو ترڅنګ به روغتیایي سکتور او جوړښتونه یې هم زر سقوط شي او بیا پر پښو درول به یې اوږدې مودې او لګښتونو ته اړتیا ولري.