تاند:( سې شنبه، د عقرب پینځه ویشتمه ) د امریکا متحده ایالاتو په پکانګریس کې د جمهوریپال ګوند غړو د دغه هېواد د بهرنیو چارو د وزیر انتوني بلینکن په ګډون، د یاد شوي وزارت ۳۴ لوړپوړي چارواکي له افغانستان څخه د امریکایي ځواکونو د نامسوولانه وتو په اړه ځواب ویلو ته ور غوښتي دي.
په دې اړه د ځواب ویلو لپاره د چارواکو د مجبورولو د هڅو مشري د کانګریس غړی مایکل مک کال کوي.
نوموړی، چې د بهرنیو اړیکو د کمېټې غړی دی، امریکایي چارواکي تورنوي چې تراوسه یې پارلمان ته ورکړي معلومات ضد و نقیض او ناقانع کوونکي وو.
یادو وکیلانو په دې اړه د امریکا متحده ایالاتو حکومت ته یو ډله ییز لیک استولی او ترې غوښتي، چې له افغانستان څخه د وتو په اړه پارلمان ته په مفصل ډول ځوابونه او قناعت باید ورکړي.
له طالبانو سره د دوحې د سولې تړون، له افغانستان څخه د امریکا پرضد د ترهګرۍ نوي رامنځته کیدونکي ګواښونه، له خطر سره مخامخو افغانانو ته د ځانګړو ویزو ورکړه، له افغانستان څخه د خطر سره د مخامخو کسانو د لېږد د بهیر په اړه د بهرنیو چارو وزارت اقدامات او په دې برخه کې درغلۍ د احضار شویو چارواکو څخه عمده پوښتنې دي، چې باید پارلمان ته توضیحات پکې ورکړي.
د کانګریس وکیلانو نه ده په ډاګه کړې، چې د بهرنیو چارو وزارت د کومې کچې چارواکي یې د کوم وخت لپاره ور غوښتي دي؟
د امریکا بهرنیو چارو وزارت په دې اړه څه نه دي ویلي.
له افغانستان څخه د امریکایي ځواکونو وتل او له دغه وتو څخه وروسته پېښ شوي ګواښونه او په افغانستان کې د تېرو شلو کلونو د لاسته راوړنو د بایلل کیدو وېره هغه جدي موارد دي، چې تل یې په اړه امریکایي چارواکي د خپلو خلکو له توندو پوښتنو سره مخامخ کیږي.