تاند:( سې شنبه، د عقرب پینځه ویشتمه )د طالبانو چارواکو ویلي، چې په دایکندي ولایت کې یې ۱۱ تنه داعشیان نیولي دي.
ویل شوي، چې نیول شوي کسان د هلمند، غزني او ارزګان ولایتونو اوسیدونکي دي.
له دوی څخه د څېړنو لړۍ پيل شوې او نور جزییات یې په اړه نه دي ورکړل شوي.
دا راپور په داسې مهال ځینو نړیوالو رسنیو د طالب سرچینو په حواله خپور کړی، چې پرون د کندهار په څلورو ولسوالیو کې د داعش ډلې پرضد د طالبانو د عملیاتو د پيل خبر ورکړل شو.
طالبانو ویلي، چې په دې عملیاتو کې یې ۳ داعشیان وژلي او ۱۰ نور یې ژوندي نیولي دي.
د طالبانو په حواله، په پرونیو پيل شویو عملیاتو کې یې د داعش ډلې څلور پټنځایونه له منځه وړي دي.
داعش ډلې د دغو راپورونو په اړه څه نه دي ویلي.
یادې ډلې په افغانستان کې د جمهوري نظام له سقوط او د طالبانو له واکمنیدو څخه وروسته، تراوسه په افغانستان کې د پينځو لویو بریدونو مسوولیت پر غاړه اخیستی.