تاند:( یکشنبه، د عقرب شپاړسمه) طالبانو د جرمني د حکومت د هغه اعلان هرکلی کړی، چې وايي دې ډلې سره د اړيکو په بيا کتنې بوخت دي.
تمه کيږي، چې د افغانستان لپاره د جرمني سفیر مارک پوتزل، راتلونکې اونۍ په دې موخه د خبرو لپاره کابل ته سفر وکړي.
نوموړی د طالبانو له واکمنیدو او د جمهوري نظام له سقوط سره، د قطر پلازمېنې دوحې ته تللی او د افغانستان وضعیت له دغه هېواد څخه څاري.
د طالبانو د وياند مرستيال احمد الله وثیق، د جرمني د دې پریکړې هرکلی کړی او هيله مندي يې ښودلې، چې په کابل کې به د ياد شوي هېواد سفارت بيرته خلاص او د طالبانو واکمني به د نړۍ لخوا په رسميت وپېژندل شي.
د جرمني ځينو رسنيو له طالبانو سره د خپل هېواد د اړيکو نوې بڼه له افغانستان سره د بشري مرستو په اړه د هڅو زياتوالی او د طالبانو تر ګواښ لاندې د ايسارو خلکو د وضعيت په اړه بحث ښودلی دی.
د جرمني په ګډون ټوله اروپايي ټولنه او ټوله نړۍ د طالبانو واکمني په رسميت نه پيژني.
اروپايي ټولنې ويلي، چې طالبانو سره اړیکې قطعآ د دوی د په رسميت پېژندلو په مانا نه دي.
پاکستان، چې د طالبانو تر ټولو نيږدې مدافع او ملاتړی هېواد دی، هغه هم د طالبانو واکمني په رسميت نه ده پېژندلې.
شنونکي د طالبانو د واکمنۍ لپاره د ملي مشروعيت نشتوالی، په زوره د دوی واک ته رسېدل، له بشري او ښځينه حقونو سره شديد مخالفت او له ترهګرو ډلو سره د اړيکو دوام د دوی د نه په رسميت پېژندل کيدو عمده دليل ګڼي.
خو طالبان بیا وايي، چې واکمنۍ يې د په رسميت پېژندلو ټول شرایط پوره کړي او بايد په رسميت وپېژندل شي.