تاند:( شنبه، د عقرب پینځلسمه) د متحده ايالاتو يوه مشهور څېړنيز بنسټ ( له دیموکراسیو څخه د دفاع بنسټ) په يوه تازه تحليل کې د افغان سولې لپاره د متحده ايالاتو د بهرنيو چارو وزارت مخکينی استازی زلمی خلیلزاد په واشنګټن کې د طالبانو استازی ګڼلی دی.
سرچينې پخپله وېبپاڼه کې په دې اړه يو مطلب خپور کړی او ویلي، چې خليلزاد که څه هم د سولې بهير د ناکامۍ پړه پر بې واکه شوي ولسمشر محمد اشرف غني اچولې، خو واقعيت دا دی چې ټوله پړه خپله د خليلزاد ده.
د لیکنې ليکوال زياتوي، چې خليلزاد طالبان په هیڅ صورت نه نقدوي، بلکې په ډېرې سپين سترګۍ يې دفاع او استازیتوب کوي.
لیکوال لیکي، چې طالبانو د سولې بهير لپاره هیڅ لیوالتیا نه لرله، اوربند او د سولې مذاکراتو ته نه حاضريدل او نقشه يې ټوله همدا وه، چې پر ټول افغانستان په کوم ډول چې واکمن شول، باید واکمن شي.
ياد شوی بنسټ، خليلزاد د سولې بهير په نوم په افغانستان کې د ټولو لاسته راوړنو د بایللو او هلته يې د نورو ګواښونو د رامنځته کيدو اصلي عامل ګڼي.
دغه بنسټ، له القاعدې ډلې سره د طالبانو نه شليدونکو اړیکو او تراوسه موجوده همکاريو ته په اشارې وايي: يوازينۍ دوه ډلې چې له خليلزاد څخه بايد منندوی وي، طالبان او القاعده دي.