تاند:( يکشنبه، د عقرب نهمه) د بې واکه شوي ولسمشر محمد اشرف غني لومړي مرستيال امرالله صالح د ننګرهار په سره رود ولسوالۍ کې د واده مراسمو پر مهال د موسيقۍ غږولو له کبله د ۳ تنو د وژل کيدو او ۱۰ نورو د ټپي کیدو پېښه غندلې ده.
نوموړي په يو لړ ټويټونو کې طالبان د يادې پېښې مسوول ګڼلي او ويلي، چې خپله غوسه يوازې د پېښې په غندلو نه شي ښکاره کولای.
د صالح په وينا، پاکستان ۲۵ کاله طالبان په دې خاطر روزلي، چې افغان فرهنګ له منځه يوسي او د دې فرهنګ پر ځای د ای ايس ای لخوا ور ښودلی تبعيضي فرهنګ عملي کړي.
ښاغلی صالح خبرداری ورکوي، چې د طالبانو رژيم دوام نه کوي، خو تر نابودۍ به یې افغانان ډېرې قربانۍ وګالي.
نوموړي ټينګار کړی، چې طالبان باید ورک کړل شي او د دې کار لپاره بايد ملي مقاومت غښتلی شي.
طالبانو بيا ويلي، چې د ننګرهار پېښه د دوی د کسانو په جامه کې شوې، چې ۳ تنه یې په تور نیول شوي دي.
البته طالبان رسمآ د موسيقۍ خلاف دي، تر ملي سروده پورې يې په ټولو سندرو او موسيقۍ بندیز لګولی او په ځینو سیمو کې یې وسله والو ډېر ځوانان د موسيقۍ اوریدو په تور وهلي ډبولي دي.
طالبانو د امرالله صالح وروستيو تورونو ته کوم غبرګون نه دی ښودلی.
ښاغلی صالح په وروستيو ورځو کې پر ټولنيزو رسنيو ډېر فعال شوی او په منظم ډول د طالبانو د کړنو په اړه خپل پیغامونه او غبرګونونه شریکوي.