سره صليب طالبانو سره د نړيوالو د خبرو غوښتنه وکړه

تاند:( شنبه، د اکتوبر ۲۳ مه) په افغانستان کې د بشري ناورين له شدت سره، د سره صلیب نړیوالې کمېټې له طالبانو سره د نړيوالو د خبرو غوښتنه کړې ده.
د دې کمېټې په وینا له دې پرته به مرستندویې ډلې په يوازې ځان د دغه ناورين په مقابلې ونه توانیږي.
په افغانستان کې د طالبانو له واکمنیدو سره، بشري ناورين اوج ته رسېدلی.
طالبان له دې کبله، چې په کابينه کې یې د نړیوال تور ليست ۱۷ غړي شامل دي او د بشري حقونو د پراخ نقض تر څنګ د قومي او مذهبي اقلیتونو، ښځو، رسنيو او عمومي حقوقو په نقض تورن دي، نړيوالو ورسره د بشري ناورين د حل لپاره خپلې مرستې درولي دي.
د سره صلیب نړیوالې کمېټې عمومي رييس رابرټ ماردیني رويټرز خبري اژانس ته وويل: له طالبانو سره د نړیوالې ټولنې تماسونه د لومړنیو خدماتو د وړاندې کولو لپاره مهم دي.
نوموړی باور لري، چې په هغه صورت کې چې نړیوالې موسسې یو بل ته لاسونه ورکړي او په ګډه کار وکړي د موقت وخت لپاره به ستونزه حل شی.
ملګروملتو د پنجشنبې په ورځ اعلان وکړ چې یو صندوق یې جوړ کړی چې په مستقیم ډول ورڅخه محتاجو افغانانو ته مرسته ورکول کېږي‎.
د سره صلیب د نړیوالې کمېټې عمومي ريیس وايي، د ملګروملتو د پراختیايی پروګرام له لوري دا جوړ شوی صندوق به د درو میاشتو لپاره د افغانانو ستونزې حل کړي.
دی وايي، د افغانستان له ۳۹ ملیون نفوس څخه ۳۰ سلنه له سوتغذیې سره مخامخ دی او ۱۸ ملیونه افغانان بشري مرستو ته اړتیا لري.
طالبانو په دې اړه څه نه دي ويلي.
د دوی د واکمنۍ څه باندې دوه نیمې میاشتې کیږي، خو تر اوسه د نيږدې ملاتړي پاکستان په ګډون یې د نړۍ هیڅ هېواد په رسمیت نه دي پېژندلي.