تاند:( شنبه، د اکتوبر ۲۳ مه) امریکا متحده ایالاتو ویلي، چې د افغانستان په اړه د «مسکو فارمټ» په راتلونکو غونډو کې برخه اخلي.
د سپینې ماڼۍ ویاند جن ساکی د یاد شوي فارمټ د تېرې چارشنبې په ناسته کې د متحده ایالاتو د استازي د نه ګډون دلیل لوژستیکي ستونزې ګڼلي دي.
هغه د یاد شوي فارمټ مخکینۍ غونډې ستایلي او د ښو پایلو یادونه یې کړې.
د امریکایي ویاند په خبره، متحده ایالات د یاد شوي فارمټ له دوام سره علاقه مند دی او ملاتړ یې کوي.
د مسکو ناسته تېره چارشنبه ترسره شوه، چې د سیمې د شاوخوا ۱۰ هېوادونو استازو او د طالبانو د اسلامي استازي یوه لوړپوړي پلاوي ګډون پکې کړی و.
په دې ناسته کې سیمه ییزو هېوادونو او روسیې له متحده ایالاتو غوښتي، څو د افغانستان کنګل کړې پانګه د طالبانو حکومت ته په واک کې ورکړي.
یادې ناستې له طالبانو هم وغوښتل، چې په افغانستان کې ټول ګډونه نظام جوړیدو ته زمینه برابره کړي.
د طالبانو استازو په دې غونډه کې ټینګار درلود، چې حکومت یې ټول ګډونه دی.
مسکو په دې ناسته کې د متحده ایالاتو د استازي په نه ګډون خواشیني ښودلې وه.
معلومه نه ده، چې د یاد شوي فارمټ بله ناسته به کله او له کومې اجنډا سره ترسره شي؟