تاند:( شنبه، د ميزان څلور ويشتمه) د امریکا متحده ایالاتو د بهرنیو چارو وزارت ویاند ند پرایس ویلي، چې تراوسه دغه وزارت د افغانستان په اړه د مسکو د روانې اونۍ په ناسته کې د زلمي خلیلزاد د ګډون پریکړه نه ده کړې.
نوموړي ویلي، چې په دې کنفرانس کې د متحده ایالاتو د پلاوي د ګډون او په دې اړه چې څوک به په دې پلاوي کې غړیتوب ولري، پریکړه نه ده شوې.
له دې سره، امریکايي ویاند له روسیې سره د افغانستان په اړه تېرې ګډې ناستې ګټورې ګڼلي او ویلي، چې له روسیې او نورو هېوادونو سره په دې برخه کې ګډ کار ته لېواله دي.
د افغانستان لپاره د روسیې د ولسمشر ځانګړي استازي ضمیر کابلوف ویلي و، چې د ماسکو ناسته کې د افغان سولې لپاره د ځانګړي امریکایي استازي زلمي خلیلزاد د ګډون په هیله دي.
خلیلزاد مخکې هم له کابلوف سره په ګډه د افغانستان په اړه څو ناستې تنظیم کړې وې، چې د روسیې ترڅنګ د پاکستان او چین استازو هم ګډون پکې درلود.
پر افغانستان د طالبانو له واکمنیدو سره داسې ښکاري، چې په متحده ایالاتو کې د زلمي خلیلزاد په اړه د چارواکو او خلکو قضاوتونه منفي شوي او په ښه سترګه نه ورته کتل کیږي.
د امریکا د پارلمان یو شمېر غړو څو ځله له طالبانو سره د دوحې تړون د پایلو په اړه، چې مذاکراتچي او لاسلیکونکی یې زلمی خلیلزاد و، سختې ملاحظې مطرح کړې او په دې اړه له زلمي خلیلزاد څخه د توضیحاتو غوښتنه کړې وه.
د متحده ایالاتو د بهرنیو چارو وزارت مرستیالې مېرمن وندي شرمن تېره اونۍ په قطر کې له طالب پلاوي سره دوه ورځیني مذاکرات لرل، خو زلمي خلیلزاد ورسره د پلاوي غړی نه و.
کوم شی چي امريکا په افغانستان کي غوتل هغه خليلزاد امريکا ته وکارول د خليلزاد باروت نور خلاس شوي او پوچ ده، اوس به امريکا نور اکتور را منځ ته کوي.