تاند:( جمعه، د ميزان در ویشتمه) د طالبانو د بهرنیو چارو وزارت تایید کړه، چې د افغانستان په اړه د مسکو ناستې ته يو لوړپوړی پلاوی لیږي.
د سرچينې په حواله، په دې ناسته کې به د طالبانو د امارت د پلاوي مشري د دوی رییس الوزرا مرستیال عبدالسلام حنفي وکړي.
ټاکل شوې، چې ياده ناسته د اکتوبر میاشتې پر ۲۰ مه مسکو کې جوړه شي.
په دې غونډه کې به د شاوخوا ۱۰ هېوادونو استازي ګډون وکړي.
هندوستان نن وویل، چې يادې غونډې ته بلل شوی او ګډون پکې کوي.
ويل شوي، چې له ناستې څخه د روسیې اساسي هدف په افغانستان کې د داعش ډلې پرضد د مبارزې د همغږي کولو او پياوړتيا لپاره ډاډ ترلاسه کول دي.
تېره اونۍ د روسیې ولسمشر ولادیمیر پوتین له افغانستان څخه د امریکایي ځواکونو له وتو وروسته، په یوه مهمه وینا کې د داعش ډلې د فعالیتونو په اړه اندیښنه وښوده او د افغانستان وضعیت یې پېچلی وباله
پوتین په ماسکو کې د هم ګټو هېوادونو اوولسمې کلنۍ غونډې ته د وینا پرمهال وویل چې له عراق او سوریې څخه افغانستان ته ترهګر را ټولیږي او کولای شي، چې د هم ګټو هېوادونو ثبات خراب کړي.
پوتین په ورته وخت کې ټینګار وکړ، چې که اړتیا شوه، د سیمه ییز ثبات د ګواښونکو لاملونو پر وړاندې به په افغانستان کې د داعش ډلې پرضد ګډ عملیات ترسره کړي.
روسيې څه موده مخکې وويل، چې په کابل کې د داعش ډلې وسله والو يې پر سفارت د برید پلان درلود، خو دوی طالبان خبر کړي او د طالبانو په عملياتو کې د سفارت شاوخوا ته ۶ داعش وسله وال وژل شوي دي.
طالبانو بيا ويلي، چې داعش ډله افغانستان او سيمې ته جدي ګواښ نه، بلکې يو مزاحمت دی، خو دوی یې مهارولی شي.
د طالبانو رژيم د داعش ډلې پرضد مبارزه کې د امريکا متحده ايالاتو د مرستې وړانديز رد کړی او ویلي، چې خپله دا مبارزه تر سره کولای شي.
د طالبانو له لفظي ډاډګيرنو سره هم مهاله، په وروستيو کې د داعش ډلې د بریدونو لړۍ په ختیځ کې له ورو هدفي وژنو څخه شمال ختیځ ولایت کندوز او سویلي ولایت کندهار ته د شيعه ګانو پر جوماتونو خونړيو ځانمرګو بريدونو ته رسيدلې او سلګونه تنو ته پکې مرګ ژوبله اوښتې ده.