تاند:( پنجشبه، د ميزان دوه ویشتمه) راپورونه وایي، چې طالبانو د پرځول شوي جمهوري نظام پرمهال د افغانستان بانک د سرپرست رئیس اجمل احمدي ۶ نیم میلیونه افغانۍ معاش د هغه په بانکي اکونټ کې کنګل کړی.
معلومه نه ده، چې د هغه میاشتینی معاش څومره و او دا ۶ نیم میلیونه افغانۍ یې د څومره وخت کار له معاش څخه په اکونټ کې زېرمه شوې وې.
له دې سره، تازه راپور کې راغلي چې د احمدي له لوري د افغانستان بانک یو شمېر ګوښه شویو کارکوونکو په دې تړاو طالبانو ته شکایت کړی او دندې ته یې د بیا ور ګرځیدو غوښتنه یې کړې ده.
طالبانو د دوی شکایت ارزولی او یو شمېر ګوښه شوي کسان یې بیا پر دندو ګومارلي دي.
اجمل احمدي د مخکيني ولسمشر له تر ټولو نيږدې کسانو څخه و، خو د نظام له نسکورېدو څخه وروسته يې د هغه ځينې سياستونه نقد کړل.
د احمدي په سر له پرځول شوي ولسمشر څخه يوه لويه برخه خلک ناراضه وو، خو ولسمشر غني سره له دې چې پارلمان احمدي ته د رد رايه ورکړې وه، نوموړی د افغانستان بانک د سرپرست په توګه ټاکلی و.