تاند(سې شنبه، د میزان۲۰) د اروپايي اتحادیې د کمیسیون مشرې اورزلا فوندرلین نن د افغانستان لپاره د یو ملیارد یورو مرسته اعلان کړه.
دا مرسته، چې یو ملیارد او ۲۰۰ ملیون ډالره کېږي، د افغانستان د ټولنیز – اقتصادي سقوط او د بشري ناورین د مخنیوي لپاره کېږي.
د اروپايي اتحادیې مشرې دا مرسته نن د جي شل یا د نړۍ د ۲۰ سترو اقتصاد لرونکو هیوادونو په غونډه کې اعلان کړه.
د جي شل هیوادونو دا انلاین غونډه پر افغانستان د خبرو لپاره رابلل شوې ده.
د جي شل په دې سرمشریزه کې، چې د ایټالیا په کوربه توب جوړه شوې د امریکا ولسمشر جو بایډن, او د هند صدراعظم نریندرمودي هم ګډون لري. خو د چین ولسمشر کشي جینپینګ او د روسیې ولسمشر ولادیمیر پوتین خپل استازي لېږلي دي.
د اروپايي اتحادیې له لوري یو اعشاریه ۲ ملیارده اعلان شوې مرسته پر پخوانۍ مرسته سربېره ده. تر دې مخکې اروپايي اتحادیې له افغانستان سره ۳۰۰ ملیون یورو بشري مرسته اعلان کړې وه.
تېره میاشت د سویس په جینیوا کې له افغانستان سره دوولس سوه ملیون ډالرو مرستې ژمنه شوې وه.
اردوغان: افغانستان ته باید شا وانړول شي
سرمشریزې ته د ترکیې ولسمشر رجیب طیب اردوغان وویل، نړیواله ټولنه د افغانستان خلکو ته شا نه شي اړولی او د افغانستان ثبات د ټولو هیوادونو لپاره مهم دی.
اردوغان وویل «دا د نړیوالې ټولنې په خیر نه ده چې افغانانو ته شا واړوي، یا دا هیواد پر خپل حال پرېږدي.»
ده د افغانستان امنیت او ثبات د درستې نړۍ لپاره مهم وباله او د همدې لپاره یې وړاندیز وکړ چې د جي شل تر مشرۍ لاندې دې یوه کاري ډله جوړه شي.
ده دا هم وویل چې ترکیه غواړي چې د دې ډلې مشري وکړي.
دا مرستی باید د یوې صالح دستګاه لخوا کنترول او د افغان مظلوم وولس لاس او ستونی ته ورسیږی نه دا چی د جاهل او مزدور طالب له لیاری د پنجابی جنرالانو او ملایانو خېټی ته ولویږی.
د طالبانو په لهجه د کفارو او ملحدينو نه مننه چې د نورو اسلامي نړيوالو په مقابل کې يې له افغانانو سره مرستې ته ټټر وواهه، خو افغان ولس بيا هم شرم نه لري د عربو او ګاونډيو هېوادونو غلامي ته يې سر ټیټ نيولی او په ځان او مال يي واکداران کړي