تاند:( سې شنبه، د ميزان شلمه) د ولسي جرګې پخوانی غړی رمضان بشردوست پر پاکستان تور پورې کړی، چې له افغانستان څخه د امریکا متحده ایالاتو پرضد د سیمه ییز بلاک جوړیدو او پياوړتیا لپاره غواړي ګټه واخلي.
نوموړي په یوه ټلویزوني مرکه کې وویل، چې په وروستیو کې به متحده ایالاتو د پاکستان دغه هڅه درک کړې وي.
بشردوست هيله من دی، چې متحده ایالاتو به له وروستيو تحولاتو سره د پاکستان دا پلان په ښه توګه درک کړی وي او ورته په کتو سره، به د دغه هېواد په اړه لازم تدابیر ونیسي.
روسيه، چین، ايران او دغه راز د روسیې تر اثر لاندې د منځنۍ اسيا هېوادونه ټول له طالبانو سره نيږدې اړيکې لري، خو يوه هم د پاکستان په ګډون تر اوسه پورې د طالبانو رژيم په رسميت نه دی پېژندلی.
د دغو هېوادونو يو شمېر چارواکو له طالبانو سره منظمې اړيکې ساتلي، خو عملا هیڅ هېواد له طالبانو څخه د واضح ملاتړ خبره نه ده مطرح کړې.
د طالبانو تر ټولو لوی حامي پاکستان، چې ۲۰ کاله مخکې يې د طالبانو د واکمنۍ په ړنګولو کې له متحده ايالاتو سره تر ټولو هېوادونو ډېره مرسته کړې او امريکا ته يې د طالب ضدو بريدونو اډې ورکړي، ولسمشر يې عارف علوي اوړمه ورځ له خلیج نيوز سره د مرکې پر مهال له طالبانو سره د پاکستان هر ډول همکارۍ رد کړې او يوازې د بشري همکاريو موضوع يې تایید کړه.
طالبانو بيا ټينګار کړی، چې منځلاری او خپلواک بهرنی سیاست مخته وړي او د پاکستان په ګډون به د هيڅ هيواد تر اغېزې لاندې نه راځي.