تاند(سې شنبه، د میزان ۲۰مه) د امریکا متحدایالتونه په قطر کې د امریکايي او طالب پلاوو د یکشنبې د ورځې له خبرو وروسته اعلان وکړ چې افغانستان ته بشري مرستې لېږي.
دا خبره پرون طالبانو اعلان کړه.
د شنبې او یکشنبې په ورځ د طالبانو د اسلامي امارت د بهرنیو چارو د سرپرست وزیر امیرخان متقي په مشرۍ د طالبانو پلاوي د امریکا د بهرنیو چارو د مرستیال وزیرې وینډي شرمن په مشرۍ له امریکايي پلاوي سره د ښځو او نجونو د تعلیم په شمول پر بېلابېلو مسلو خبرې وکړې.
د نیویارک پوسټ ورځپاڼې د راپور له مخې، د امریکا د بهرنیو چارو وزارت ویندوی نیډ پرایس له طالبانو سره خبرې مسلکي او ګټورې وبللې. طالبانو هم خپلې خبرې ښې بللې دي.
پرایس وویل چې د امریکا متحدو ایالتونو افغانستان ته د بشري مرستو د لېږلو ژمنه وکړه.
«د اکتوبر په نهمه او لسمه د بېلابېلو ادارو (امریکايي) پلاوي د قطر، دوحې ته سفر وکړ چې د طالبانو له جګپوړو استازو سره وویني. امریکايي پلاوي په خبرو کې پر امنیتي او تروریستي اندېښنو او له افغانستانه د امریکايانو، نورو بهرنیانو او زموږ د افغان شریکانو د خوندي وتلو پر موضوعاتو تمرکز وکړ. دوی همداراز د افغانستان د ټولنې په ټولو برخو کې د ښځو د معناداره ګډون په شمول د بشري حقونو په رعایت کېدو ټینګار وکړ.»
د امریکا د بهرنیو چارو وزارت د ویندوی په وینا دواړو خواوو د امریکا د دې شرط په اړه هم خبرې وکړې چې بشري مرستې به په مستقیم ډول افغانانو ته په لاس ورځي.
ده دا هم وویل چې د طالبانو په اړه به په خبرو نه بلکې د هغوی په عمل قضاوت کېږي.
خو طالبانو دا خبره رد کړه چې امریکا دې په افغانستان کې د داعش پر ضد په عملیاتو کې مرسته وکړي. دوی وویل، حتي که امریکا خپلې مرستې له دې مسلې سره تړي، مرستې دې هم نه ورکوي.