تاند:( سې شنبه، د ميزان شلمه) د افغانستان د بيارغونې لپاره د امريکا متحده ايالاتو د مرستو د څارنې ادارې (سيګار) په يوه تازه راپور کې د افغانستان د ۲۰ کلنې جګړې د مرګ ژوبلې په اړه خپل ارقام خپاره کړي دي.
دغې ادارې ويلي، چې په تېره شل کلنه جګړه کې لږ تر لږه د افغانستان د تېر جمهوري نظام تر ۶۶ زرو پورې سرتېري وژل شوي.
سرچينې همدا شان، په تېرو شلو کلونو کې د وژل شويو ملکي کسانو شمېر ۴۸ زره تنه ښودلې ده.
د سيګار ادارې د معلوماتو له مخې، په ۲۰ کلنه جګړه کې تر ۷۵ زړو پورې افغان ملکيان ټپيان شوي هم دي.
دغې ادارې د افغانستان په جګړه کې د امریکايي سرتیرو د مرګ ژوبلې جزییات هم خپاره کړي دي.
د سيګار د معلوماتو له مخې، په تېره ۲۰ کلنه جګړه کې ۲۴۴۳ تنه امريکايي سرتيري او د دوی ۱۱۴۴ تنه نور بهرني متحدين وژل شوي دي.
نورو سرچينو په دې اړه څه نه دي ويلي.
د افغانستان جګړه، افغانستان او امريکا دواړو ته له تر ټولو اوږدو جګړو څخه وه.
اوس د دې جګړې له داسې پای ته رسیدو سره، چې افغانستان پکې بيا د طالبانو لاس ته لوېدلی، امریکايي او مخکيني افغان چارواکي ټول تر سختو نيوکو لاندې دي.
په افغانستان کې د امريکايي او ناټو ځواکونو پخواني عمومي قومندان جنرال مک کرسټال په يوه تازه مرکه کې وویل، چې په افغانستان کې د رامنځته شوي وضعيت په اړه بايد څېړنې وشي او د دغې بايلې لاملونه دې روښانه شي.